ليه مش بأرد ع الموبايل على طول؟


ليه مش بأرد ع الموبايل؟

تقريبا أول بوست أكتبه بالعامية تماما.. بس حاولت أكتر من مرة في مقدمة جادة بالفصحى وفشلت..ه

المهم، أنا كتير بتسئل: “فينك؟” أو بيتزعل مني بالفعل علشان مش بأرد في الحال ع المكالمات أو الرسايل وتحديدا رسايل الواتس آب..ه
والحقيقة علشان أجاوب حد أنا ليه مبردش بسرعة، هنضيع الوقت اللي ما صدقنا لقيناه.. فبقيت أول ما ألاقي فرصة أحسس وأعتذر.. قصدي: أرد وأعتذر..،أرد وأعتذر..ه
وبعدين قريتها في عينين كتير من صحابي “خلاص يا ست المهمة عرفنا إنك مشغولة” فقررت إني أحاول أحصر وقتي بيروح في إيه ولقيت بالورقة والقلم التالي:ه

خدوا عندكو:ه
الأسبوع فيه 168 ساعة
لو هنام في اليوم 6 ساعات -بعد إذنكم طبعا- آدي 42 ساعة
زود عليهم 40 ساعة شغل في الأسبوع، آدي 82
نحط كمان 10 ساعات عبارة عن أكتر من ساعة يوميا سواقة، ده على اعتبار إني مرحتش أي مكان غير من البيت للشغل ومن الشغل لمدرسة الولاد للبيت، آدي يا سيدي وستي 92

أي أم أو أب متعاون يعرفوا إن الواجبات مش بتاخد أقل من ساعة طبعا ضيف عليها الفصال وفض المنازعات والمناورات حول تغيير هدوم المدرسة والصلاة والغدا…. نقول ساعتين في 5 أيام، يبقى وصلنا 102

ورغم إن في واحدة -بفضل الله- بتساعدني في البيت 3 أيام في الأسبوع (نعمة وفضل من ربنا) إلا إن ده لا يمنع إني ع الأقل برضه ساعة بدري وساعة بعد الضهر بشتغل شغل البيت من تحضير أكل لتوضيب غسيل وخلافه، نزود 14، يبقى كدة يا مؤمن وصلنا 116

بعد فض منازعات الواجب، عائلتي الكريمة ليها حق عليّ ع الأقل ساعتين يوميا كواليتي تايم، أيوة يعني أسمع مشكلة حصلت في المدرسة، أتسئل كام سؤال وجودي من أولادي، أتكلم مع أمي كلمتين يطولوا شوية،…..ه
نزود 7 تانيين لي أنا شخصيا بقى: صلاة.. اهتمام بالنفس.. قراءة.. لحظة فراغ أو تتنيح كما يطلق عليها يبقى كدة كام؟ 137

طيب أنا بدرس زي ما كتير منكم عارفين، واللي مش عارف، آديه عرف، فالمفروض المفروض أذاكرلي ساعة في اليوم إن أمكن، يبقى كدة 144

نقفلهم 148 لو رحت زيارة شوبنج لاحتياجات البيت الأساسية، ولا جبت سيرة لبس ولا أوكازيون ولا غيره.. مش فاضيين..

نيجي بقى لموضوعنا: الفيسبوك وواتس آب و-حبيبي- تويتر (حبيبي لأنه أقلهم إزعاجا)، والإيميلات الشخصية والتليفونات، أنا هديها ساعتين يوميا يبقى كدة 162
كدة فاضل 6 ساعات متوزعين ع الأسبوع

وبما إن الحياة سلسلة متكررة من الاستثناءات كما لاحظت أنا بعد 33 سنة خدمة فيها.. فلكم أن تتخيلوا ممكن الـ6 ساعات دول يطيروا في إيه:ه

1- مشوار على غير العادة للناحية الأخرى من العالم: شرق القاهرة
2- عزومة لطيفة
3- مشكلة ألطف

مع الأخذ في الاعتبار إني:
1- مش ببعت رسايل وأنا سايقة
2- مش بأرد وأنا في محطة البنزين
3- قدر الإمكان مش بمسك الموبايل كتير وأنا مع أي حد لأني بكره منظر الوش الملزوق في أي شاشة لما يكون في بشر حواليك

وهنا ننتقل للمميزات اللي هتعود عليكم من كل ما مضى:ه
ه- لو الزمن سمح يا جميل واتقابلنا، ففي الأغلب هتاخدوا حقكو كواليتي تايم لأني مش همسك الموبايل كتير وأنا معاكم إلا للضرورة القصوى.
ه- لو الزمن سمح برضه واشتغلنا مع بعض هتبقوا عارفين إني بركز في الشغل لدرجة إني مش ببص ع الرسايل الشخصية طول اليوم.ه

وآخر ميزة: هعاملكم بالمثل، يعني دايما هلتمس لكم العذر ومش بزعل بالساهل أبدا.ه

سامعة أم بتقوللي يا هبة فين التمرينات والرياضة.. أقولها لأ ده كلام عايز بوست تاني.. والبوست مكنش معمول حسابه في الـ168 ساعة :)ه

سلام

Advertisements

5 thoughts on “ليه مش بأرد ع الموبايل على طول؟

  1. سبحان الله يا هبه فعلاً الوقت بيجرى بسرعة رهيبة وأنا فعلاً بدأت أكره التكنولوجيا البيت كله ماسك الموبايل أو الباد أو بيتفرج على التليفزيون وحاجة ضايعة.

  2. الله يعينك يا حبيبتى لك حق فى كل كلامك …. بس إنتى برضه سكر وعسل وست البنات ومحدش يقدر يستغنى عن الكلام معاك…. إستحملى وأمرك لله…

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s